Ads By Google


الفرق بين انواع كروت الشاشة Shared , Dedicated & Switchable


Ads By Google

الفرق بين أنواع كروت الشاشة Shared , Dedicated & Switchable

لما بتروح تشتري لاب توب من محل أو مكان معين البايع اللي هناك بيقولك إن اللاب دة بييجي بمواصفات كويسة وكرت شاشة حلو من إنتل ويقولك فيه لاب توب تاني بكرت شاشة أقوى من Nvidia أو AMD بحجم 2 جيجا بايت مثلاً وتسأله إيه الفرق؟

فيترسم عليك شوية ويقولك كرت الشاشة دة Shared ودة Deticated واللاب دة كرت الشاشة فيه Switchable

وحضرتك واقف متنَّح !! وتقوله: وضحلي معلش .. فإيه بقا الفرق بين أنواع كروت الشاشة دي في اللاب توب وإيه الأقوى والأفضل وإيه اللي يناسب إستخدامك ؟؟! تابع الموضوع

لو حابب تشوف الفيديو فهو فيه كل الكلام اللي مكتوب هنا ، ولو حابب تكمل قراءة ولا كإنك شفت الفيديو دة

خليني أقولك إن البائع في أغلب الأحوال عاوز يبيع ومش عاوز يمشيك من عنده إلا لما يبيع طالما جيتله برجليك .. زبون بقا 😀

بس عشان منظلمش كل البائعين فيه منهم ناس فعلاً بتوضح بكل بساطة الفروقات دي للزبون خاصةً لو حس إنه مش فاهم هو بيقول إيه، وفيه منهم عديم الضمير بيقنع الزبون بجهاز معين عشان عرف هو عاوز يدفع كام .. دي حاجة مش بتاعتنا وكل واحد وأمانته بقا ولكن خلينا نوضح من أبو آخر.

كروت الشاشة في اللاب توب

انواع كروت الشاشة

فيه عندنا 3 أنواع من كروت الشاشة دي:

1. كرت شاشة Shared : معناه إن الكرت دة بيشارك الجهاز في الرامات يعني لما بيحتاج ذاكرة إضافية بيروح يآخد شوية من حجم الرامات الأساسية بتاعتك ودة ممكن ييجي على حساب بعض البرامج التانية اللي حضرتك بتستعملها، عشان كدا تلاقي البائع بيقولك بكل ثقة كرت الشاشة دة يا باشا Up to 2 جيجا أو 4 جيجا مثلاً .. يعني كل مازودت الرامات يكون أحسن عشان الكرت يستفيد بالمساحة الإضافية.

ممكن يكون الكرت دة Intel أو AMD أو Nvidia لكن مش مقياس إن الكرت هيكون صاروح بقا ويشغل أجمد الألعاب وبرامج المونتاج وخلافه لأن فيه مواصفات تاني لكرت الشاشة مهمة جداً غير الحجم، المهم يعني الكرت الShared دة يعتبر إمكانياته على قدها مش قوي يعني ولا حاجة لكن من مميزاته إنه من انواع كروت شاشة اللي درجة حرارتها مبتكونش عالية.

2. كرت شاشة Dedicated : دة بيكون مستقل لوحده .. معاه راماته وسلطاته وملوش دعوة برامات الجهاز يعني إنت في حالك وأنا في حالي، ممكن يكون Nvidia لوحده أو AMD لوحده وكل ما كان حجم ذاكرته أكبر كل ما كان أحسن طبعاً.

اقرأ أيضاً:

3. كرت شاشة Switchable : دة بقى برنس البرانيس في أجهزة اللاب توب .. ليييييه يا بدررري؟

عشان دة يعتبر الحل المناسب اللي بيقدر يوصل للمعادلة الصعبة وهي إنتاج جودة عالية مع حرارة أقل .. ليه بردو ؟

أقولك ياسيدي: دة لأنه بيكون اللاب توب فيه كرتين مع بعض واحد إنتل والتاني نيفيديا أو AMD فطبيعي الكرتين مش هيشتغلوا مع بعض، لكن بيكون على حسب الطلب، والهدف الأساسي في النوع دة هو توفير الطاقة وتقليل درجة الحرارة.

كرت الشاشة إنتل مخصص للتصفح والاستخدام العادي البسيط والبرامج اللي مش بتحتاج كرت شاشة عالي.

أما الكرت التاني سواء كان Nvidia أو AMD بيكون مخصص للألعاب والبرامج التقيلة اللي بتشتغل بشكل تلقائي مع الكرت القوي وفي بعض الحالات باختلاف نوع اللاب توب أو نسخ الويندوز بتضيف البرامج أو الألعاب التقيلة دي لكرت الشاشة القوي دة 😀 وممكن لو عندك وقت تشوف الفيديو دة كمثال عملي عشان تفهم الموضوع أكتر

الخلاصة:

  • الكرت الـShared يعتبر ضعيف في الامكانيات ولا ينصح به إلا للتصفح والاستخدام العادي جداً لأن الذاكرة بتاعته بتآخد من ذاكرة اللاب توب على الرغم إنها بتكون ميزة في بعض الأوقات.
  • أما الكرتين الـ Switchable والـ Dedicated فالذاكرة بتاعتهم مستقلة عن رامات اللاب بس الفرق إن الـDedicated شغالة عمال على بطال طول ما انت فاتح اللاب وبتلاحظ ارتفاع في درجة الحرارة مع كُتر الإستخدام.
  • لكن الـSwitchable بتشغل الكرت المناسب عند الحاجة ودة بيساعد في توفير الكهربا وتقليل درجة الحرارة.

وفي النهاية بنصح بإستخدام مروحة تبريد إضافية بكون في قاعدة مخصصة للاب توب خاصة في الصيف أو الأماكن المغلقة، وكان هذا مقالاً توضيحياً للفرق بين انواع كروت الشاشة المستخدمة في الكمبيوتر فلا تنسَ مشاركة الموضوع مع أصدقاءك لتعم الفائدة على الجميع ولأي إستفسار برجاء كتابته لنا عبر التعليقات.


مقالات أخرى قد تعجبك

عن Ahmed Elgarnosy

إسمي أحمد الجرنوسي عُمري 28 سنة - يوتيوبر مصري ومدون تقني ومؤسس موقع تكنو عربي المهتم بتقنيات وشروحات الكمبيوتر والجوال المختلفة، وهدفي هو النهوض بالمحتوى العربي ونشر المعلومة من خلال كتابة المقالات والشروحات المرئية .. وأتمنى من الله التوفيق.

اترك رد

x

‎قد يُعجبك أيضاً

فتح الكمبيوتر ببصمة الهاتف للاندرويد

طريقة فتح الكمبيوتر ببصمة الهاتف

شرح طريقة فتح الويندوز ببصمة الجوال