نوكيا ملكة الجودة تعود من جديد لسوق الهواتف الذكية بهاتف نوكيا 6
بالتعاون مع الشركة الفنلدية HMD Global صاحبة حقوق الموبايلات التي يتم إصدارها تحت شعار Nokia عادت نوكيا بإنتاج هاتف جديد أطلقت عليه إسم Nokia 6 لأول مرة بنظام تشغيل أندرويد وسيتم الإعلان أيضاً عن هاتف نوكيا 3310 الجديد لعام 2017 في مؤتمر “MWC “Mobile World Congress الذي يُعقد سنوياً في مدينة برشلونة آخر شهر فبراير 2017 وسيكون مع هاتف اعلان هاتف سامسونج جالاكسي إس 8 الجديد، وفي هذا الموضوع سنعرض لكم مواصفات موبايل نوكيا 6 وسعره مع ذكر أهم المميزات والعيوب للهاتف.
التصميم والمعالج
لو هنبص على التصميم هنلاقي الموبايل مصنوع من مادة الألومنيوم ووزنه 169 جرام تقريباً
المعالج CPU سناب دراجون 430 Octa Core ثماني النواة بتردد 1.4 جيجا هرتز
ومعالج الرسوميات GPU من نوع أدرينو 505
الذاكرة
الذاكر العشوائية RAM لأول مرة من نوكيا 6 بحجم 4 جيجا بايت، والذاكرة الداخلية بسعة 64 جيجا بايت، وتقدر تضيف كرت ميموري لحد 128 جيجا بايت وتهيص.
الشاشة
حجم الشاشة هو 5.5 بوصة بدقة Full HD 1080*1920 من نوع ips وبكثافة 400 بكسل لكل بوصة، والشاشة عليها طبقة زجاجية من نوع جوريلا جلاس 3 للحماية.
الشاشة من قدام تقريباً واخدة مساحة كبيرة وبتلاحظ إنحناء بسيط في أطراف الشاشة عشان ملمسها يبقى في اللذيذ وتحت بنلاقي finger print أو مستشعر بصمة في نص الشاشة من تحت زي زرار الهوم في موبايلات سامسونج.
كاميرا هاتف نوكيا الجديد
من فوق موجود الكاميرا الأمامية بدقة 8 ميجا بكسل بفتحة عدسة 2.0 ومستشعر ضوء وبينهم سماعة المكالمات و ع اليمين بالعرض موجود شعار البرنس nokia.
من ورا لا مؤاخذة بردو موجود الكاميرا الخلفية بدقة 16 ميجا بكسل وبردو بفتحة عدسة 2.0 وتحتها ع طول فلاش ثنائي Dual Flash وتحتهم بالطول شعار البرنس.
البطارية ونظام التشغيل
نوكيا 6 هييجي بنظام تشغيل أندرويد 7.0 نوجا، وسعة البطارية الموجودة في موبايل نوكيا الجديد هي 3000 ملِّي امبير غير قابلة للإزالة وبتدعم الشحن السريع.
مواصفات نوكيا 6 الأخرى
من تحت موجود مكان الشحن USB Tybe C وعلى يمينه فتحتين للسماعات الخارجية وعلى شماله مايك الماكالمات
وبالنسبة لصوت الموبايل فنوكيا بتستخدم تقنية دولبي اتومس عشان الصوت يكون ستيريو وفشيخ سواء مع السماعة الخارجية او سماعة المكالمات.
منفذ السماعات موجود في الموبايل من فوق بفتحة 3.5 مم وعلى اليمين موجود زرار الباور وزرارين تعلية وتوطية الصوت وبتمنى يكون ملمسهم مختلف طالما الاتنين في جنب واحد، وعلى الشمال درج الشريحة وكرت الميموري.
سعر موبايل نوكيا 6
وهيكون سعر الموبايل 245 دولار تقريباً ودة سعر مناسب جداً ومميز مقارنةً بمواصفات الموبايل الكبيرة.
الموبايل متوفر فقط كبداية في السوق الصيني ودة بسبب إن الصين فيها أكتر من ملياااااار نسمة
السؤال هنا بقا .. نوكيا كانت الملك في سوق الموبايلات من أكتر من 10 سنين .. هل هتقدر تنافس بقوة أبل وسامسونج وواوي واتش تي سي والعمالقة التانيين؟؟!
فيديو لمراجعة هاتف نوكيا 6 الجديد
بعض الأمور اللي بتمناها من شركة نوكيا عشان تثبت وجودها:
- خدمة العملاء: يجب ان يركزوا على ذلك وان لا يسقطوا بما سقطت فيه HTC و Motorolla وبعض الشركات التانية.
- سرعة التحديثات: اليوم شركات الهواتف مثل هواوي وhtc ما يعيبها هو بطئ صدور التحديثات، فلتكن تحديثات هواتف google قدوتها.
- السعر الحقيقي للسلعة وليس المبالغات التي نراها اليوم من samsung و apple كما عودتنا نوكيا قبل ما نعرف الأندوريد والـiOS.
- توحيد المنتج وعدم تشتيت المستخدم بين عشرات المنتجات كل عام.
- اعادة نوكيا التي كانت تأتي ببطارية جبارة وكاميرات مميزة ومتانة تصنيع عالية.
- من المهم ان تكون هواتفهم ضد الماء والغبار وبعتاد يلائم متطلبات مختلف الفئات العمرية.
دي كانت أهم الأمور اللي تقدر تميز نوكيا وتخليها تنافس بقوة على الأقل أكبر الشركات الصينية زي تشاومي و One plus و وواوي.
كبداية أنا شايف الموبايل دة بمواصفاته الجميلة دي إن سعره مناسب جداً ومش مبالغ فيه تماماً وأكيد هعملك مراجعة كاملة لنوكيا 6 أول ما ينزل مصر إن شاء الله.
