تكنو عربي شروحات وتحميل أحدث البرامج والألعاب
تعريف التورنت وما هي مميزاته وكيفية إستخدامه
إذا كنت من محبي تحميل الملفات من الإنترنت بواسطة برامج التحميل العادية مثل عملاق التحميل برنامج انترنت داونلود مانجر أو برنامج Flareget وغيرهم فلا بد وأن لاحظت تداول عبارة التحميل بالتورنت وأردت أن تعرف الكثير عنه ولكن قد تجد بعض الشروحات عن التورنت وتخرج منها بدون أن تفهم بالشكل الكامل ما تريد أن تعرفه.
واليوم إن شاء الله سأحاول أن أقدم لك كل ما تريد أن تعرفه عن التحميل بالتورنت وما هي مميزاته؟ وهل هو أفضل من التحميل العادي أم لا؟ وما هي أفضل مواقع وبرامج التورنت التي يجب أن تستخدمها بكل تفصيل من خلال موقع تكنو عربي لتحميل أحدث البرامج والألعاب وعرض أهم المشاكل والحلول.
تم عمل شرح كامل ووافي للتورنت فإذا كنت لا تريد تكملة قراءة الموضوع فأنصحك بمشاهدة هذا الفيديو بجانب كوب من القهوة أو النسكافيه
تعريف التورنت ولماذا هو أفضل من التحميل العادي وكيف يمكن إستخدامه للتحميل بأقصى سرعة
ما هو التورنت Torrent ؟
مثلما يوجد تحميل عادي للبرامج والأفلام والألعاب والصور والأغاني أو أي ملفات ببرنامج الداونلود مانجر أشهر برنامج للتحميل هناك أيضاً التحميل بالتورنت الذي يقوم بدوره بتحميل أي نوع من الملفات عبر الإنترنت ولكن على صورة تورنت!
تعريف التورنت : هو بروتوكول مشاركة الملفات عبر الانترنت ما بين مستخدمي الإنترنت والمسمى الند للند أو النظير للنظير ( Peer-to-peer ) ويكون تبادل الملفات بين أشخاص دون وجود وسيط ما عدا ما يسمى التراكرز Trackers وسوف نقوم بتعريفه بعد قليل، وكل نظير يقوم بتحميل البيانات فهو يرفع البيانات للآخرين في نفس الوقت.
وفي شهر إبريل لعام 2001 قام المبرمج الأمريكي برام كوهين بتصميم بروتوكول التورنت وتم تطبيقة لأول مره في يوليو من نفس العام وهو مدعوم من شركة كوهين بت تورنت inc واللغة المستخدمة في برمجة البروتوكول هي لغة بايثون.
بكل بساطة التورنت ما هو إلا نظام تحميل غير التحميل بالروابط المباشرة التي تعودنا دائماً عليها فهو عبارة عن نظام مشاركة الملفات المختلفة (ألعاب، برامج، صور، أفلام، كتب، مسلسلات، جن أزرق .. كل حاجة) بين كل المستخدمين في العالم.
أي بإختصار أن الملفات التي تقوم بتحميلها بالطرق التقليدية العادية تستطيع أيضاً أن تقوم بتحميلها بواسطة خاصية التورنت ولكن ببعض المميزات الإضافية التي لن تجدها في برامج التحميل التقليدية.
أشهر وأفضل برامج التورنت
افضل برامج التورنت
هناك الكثير من برامج التورنت المختلفة التي يفضلها العديد من محبي التحميل بواسطة الـ Torrent لكن أشهرهم:
- برنامج µTorrent (يو تورنت).
- برنامج BitTorrent (بت تورنت).
- برنامج BitComet (بت كوميت).
- برنامج Vuze.
وسوف نقوم بشرح كل تطبيق منهم بالتفصيل من خلال موقع تكنو عربي؛ حتى نختار لك أفضل برنامج تورنت مع شرح كيفية التحميل.
تعالوا ندردش بالعامية شوية قبل ما ندخل ونتعمق في الموضوع عشان نفهم مع بعض إيه هي طرق التحميل الموجودة على الإنترنت واللي هنقسمها لـ 3 عناصر عشان دماغك تكون مفتحة بشكل أكبر:
1- ملفات موجودة على مواقع Http
2- ملفات موجودة على مواقع Ftp
إيه ياعم الجرنوسي http و الـftp دة ؟؟؟
دول بروتوكولات أو طرق بتحدد الإتصال بين الجهاز بتاعك إنت كمستخدم ومابين السيرفر اللي بتحمل منه، وكل اللي أقدر أقولهولكم عشان دماغمك ماتسرحش إن الـ HTTP دة بيتم إستخدامه لنقل الملفات بين الخادم والمتصفح، أما الـ FTP فبيتم إستخدامه لنقل الملفات بين الأنظمة.
ولو هنضرب مثال للتحميل من مواقع الـHttp فهيكون عندك مثلاً برنامج الداونلود مانجر أو Download Accelerator Plus، أما للتحميل من مواقع الـFTP فعندك برنامج إسمه Flash FXP.
3- ملفات موجودة على أجهزة مستخدمى شبكة الإنترنت
بالنسبة للملفات الموجودة على مواقع Http و Ftp فالملفات دي بتكون متخزنة على شبكة الإنترنت نفسها فى مساحات متخصصة ليها زي مثلاً مواقع الرفع المشهورة ميديا فاير وفور شيرد وغيرهم..
وبكدا نقدر نعتبر إن الإنترنت زي الهارد ديسك بالظبط في الحالة دي ولكن هارد كبير شوية، وكإنك بتعمل عملية Copy للي انت عاوزه منه للجهاز بتاعك
طيب .. الملفات دي جت على النت إزاااااي؟
أكيد فيه شخص رفعهم من جهاز الكمبيوتر بتاعه عشان يكونوا موجودين ع الشبكة
فالشخص دة بقا إسمه الـUploader أو الرافع، والعملية اللي رفع بيها الملفات إسمها Upload، وحضرتك لما بتيجي تنزل الملفات من الشبكة على جهازك أو موبايلك الصغنن فالعملية دي إسمها Download تحميل طبعاً 😀
مصطلحات لازم تعرفها في التورنت
طالما قريت الكلام اللي فات دة كله فى التورنت، يبقى فيه شوية مصطلحات أو مفاهيم لازم تكون عارف معناه على الأقل عشان تكون فاهم الموضوع بيتم إزاي ولما حد يسألك تعرف تجاوبه بثقة 😉
مصطلحات في التورنت
المصطلح الأول: Seed و Peer
Seed دة الشخص أو الجهاز اللي بيكون عليه الملف بالكامل، واللي بينقل منه إسمه Peer
المصطلح الثاني: Seeder
ودة الشخص او مجموعة الاشخاص اللي عندهم الملف بشكل مجزأ (يعني معندهمش الملف بالكامل).
المصطلح الثالث: Super
ودة أول شخص بيرفع الملف للانترنت وبيسمح بمشاركته.
المصطلح الرابع: Swarm
ودة مجموعة الأجهزة اللي بيتم التحميل منها في نفس اللحظة.
المصطلح الخامس: Tracker
دة سيرفر بيقوم بعملية التوزيع للملف.
المصطلح السادس: Health
ودة بيتأكد من وجود عدد الـSeed وعدد الـSeeder وكل ما زاد عددهم كل ما زادت سرعة التحميل.
المصطلح السابع: Leeches
ودة الشخص البخيل اللي هو بيحمل من خلال أجهزة غيره بس مبيسمحش لحد يحمل من خلاله.
يعني ببساطه شديده كل اللي إستفدناه من الكلام اللي فات دة هو إن كل ما زاد عدد الـSeed والـLeeches كل ما سرعة التحميل زادت وإمكانية تحميله متاحة بشكل كبير.
وعشان كدا لما تنوي تحمل ملف تورنت فاختار التورنت اللي فيه Seed و leeche كبيرة.
مميزات التورنت
طيب إيه بقا اللي بيميز التورنت عن التحميل العادي؟ .. إقنعني ياعم عشان أصدقك !
الميزة الأولى:
في التحميل العادي كل مازاد الطلب والضغط على الملفات للتحميل في وقت واحد فسرعة التحميل بتتأثر وأحياناً بيحصل أخطاء؛ بسبب الزحمة الكبيرة دي أو حتى ميرضاش يتحمل معاك الملف إلا لما الضغط يخف شوية فبتضطر تعيد تحميل الملف من جديد، ودي مشكلة أكيد معظمكم واجهها.
أما بقى في التحميل بالتورنت فالعملية عكسية .. كل مازاد الطلب على التحميل كل ما السرعة زادت بمعنى إنه لما بتكتر عملية التحميل في التورنت فبيزيد عدد الـSeeder والسرعة بتعلى مع الوقت.
الميزة التانية:
استكمال التحميل: واحد هيقولي ماهو انا بقدر استكمل التحميل ببرنامج داونلود مانجر، هقوله مش في كل الملفات يا حيلتها، وكمان لو بتحمل ملف حجمه كبير جداً وليكن لعبة حجمها 20 جيجا ومش بتدعم إستكمال التحميل لازم تسيب جهازك بقا 3 شهور على بال ميخلص تحميل، وابقى قابلني لو النت معملهاش معاك.
لكن في التحميل بالتورنت لو بتحمل ملف حجمه 1 تيرا (1024 جيجا بايت) فبيتم إستكمال التحميل في أي وقت (يعني ممكن تنام وتسيب الجهاز وممكن تقفل الجهاز عادي وتفتحه وهيكمل تاني مكان ما وقف، وممكن تحدد السرعة اللي انت عاوزها عشان يحمل بيها وميسببش بطء للنت عندك).
يعني تقدر تستكمل التحميل لأي نوع من الملفات مهما كان حجمها ويمكن دي أكتر ميزة بتعجبني في التورنت.
الميزة التالتة
إنك تقدر تحمل مجموعة من الملفات في صورة فولدر مش ملف مضغوط!
الملف المضغوط في التحميل العادي بيجبرك تحمله كله لكن في التورنت تقدر وانت بتحمل إنك تحدد ملفات معينة تحملها ! إزاي الكلام دة ؟
كمثال لو إنت بتحمل فيلم مثلاً بالتورنت، في الغالب بتلاقي ملف صغير مع الفيلم إسمه Sample (كمثال معاينة) للفيلم فممكن وانت بتحمل تحدد الملف الصغير دة عشان تشوف هل الفيلم جودته حلوة ولا لأ عشان متحملوش ع الفاضي.
طريقة التحميل بالتورنت
شكراً ياعم جرنوسي على شوية الرغي الحلوين دول .. ممكن تلخص وتقولي بقا إزاي استخدم التحميل بالتورنت وإيه هي المواقع اللي اقدر أحمل منها عشان ننجز..
بالراحة عليا ياعم .. زي ما قلتلك هتحتاج طبعاً لبرنامج تورنت وأفضلهم يوتورنت أو بيت تورنت ودي برامج حجمها صغير جداً ولو طلعت فوق لما اتكلمنا عن أشهر وأفضل برامج التورنت هتلاقيني سايبلك الرابط الرسمي لكل برنامج وكمان هخخصص لهم شرح على الموقع هنا وعلى قناة احمد الجرنوسي على اليوتيوب.
أشهر وأفضل مواقع التورنت
طيب المواقع موجود منها كتييييير جداً وفيه مواقع عربية كمان للتورنت وهيتم عمل موضوع مخصص ليهم بردوا لكن خدوا دول أشهر موقعين واحد أجنبي وواحد عربي:
وأخيرا عشان الموضوع ميكونش طويل أوي فهنختم لحد كدا لكن مش دي النهاية، وهيتم إن شاء الله شرح أفضل برنامج للتحميل بالتورنت وشرح أسرار التورنت وكيفية تسريعه + طريقة تحويل التحميل العادي للتحميل بالتورنت في دروس جاية على الموقع والقناة بإذن الله.
وفي النهاية متنساش تشارك الموضوع من خلال علامات المشاركة اللي على شمالك ولو كان عندك أي إستفسار ياريت تكتبهولنا في التعليقات وهكون سعيد جداً بالرد عليك في أسرع وقت إن شاء الله.
شكرا لك شرح كافي ووافي.
شرح رائع ومفيد جدا شكرا لك، ومزيدا من الابداع